Nor da pertsonaia ezkutua?

Gorka Palazio irakasleak honako ariketa hau proposatu zigun: datu hauek irakurrita irrati-telebistaren historian sona edo ospea lortu duten pertsonaiak zein diren asmatu behar genuen.

0. Errusian sortu zen, Murom hirian hain zuzen, 1899an; eta 1982an hil zen. AEBetan bizitza profesionala egin zuen asmatzaile honek Vladimir zeukan izena. Aditu askok diote bera izan zela telebista elektronikoaren eta bideoaren aita. 1923an, ikonoskopioa asmatu zuen, hau da, irudiak jasotzeko tutua. 1929an kineskopioa ere asmatu zuen. Westinghouse eta Radio Corporation of America (RCA) enpresetan lan egin zuen. II. Mundu Gerran AEBetako gobernurako aholkulari zientifikoa izan zen.Vladimir Zworykin

1. CNN telebista kate ospetsuaren jabea eta gizon aberatsa. 1938. urtean sortu zen eta Robert Edward izena jarri zioten gurasoek. Familia aberats baten hirugarren pertsonaia ospetsua. 2002an, 9.300 milioi dolar galdu zituen AOL Time Warner enpresak kolapsoa eduki zuenean merkatuan. United Nations Foundation-i mila milioi dolar eman zion. Jane Fonda artistarekin egon zen ezkondurik.Ted Turner

2. Kazetari, idazle, telebistalari eta kultur eragile gipuzkoarra. Urrestillan jaioa, 1938an. Merkataritza ikasketak egin ostean, Loiolako Herri Irratian hasi zen esatari lanetan 1962tik 1982ra bitartean. Ez dok amairu taldearen sortzaileetarikoa eta ETBko erredaktore-burua 1983tik 1985ra. Euskaltzain urgazlea eta ETBko zuzendari eta programazio-buru ohia izan zen. Liburu batzuen idazlea: Noiz amatxo? eta Euskal dantzak, kasurako. Joxe Mari Iriondo

3. Euskal Telebistaren proiektua pertsonaia honek burutu zuen. Tolosan jaio zen 1928an eta aita idazle ospetsua izan zen Tolosako alkatea eta EAJkidea izateaz gain. Bere ekimenez ETBz gain, HABE, Euskadi Irratia eta Euskadiko Orkestra sinfonikoa ere sortu ziren. Ramon Labaien

Palazio's mobCVlog: Nor da pertsonaia ezkutua?

krisi ekonomikoari buruzko bideolana

Hona hemen Maitek eta biok egindako bideolana






krisi ekonomikoa by Eneritz eta Maite is licensed under a Creative Commons Reconocimiento-No comercial 3.0 España License.

La buena nueva filmea

Sinopsia
Nafarroako langile-herri bateko parroko izendatu dute Migel, 1936ko matxinada garaian. Herri horretan sozialisten aldekoak dira nagusi eta horregatik, nazionalen eraso eta zapalketa bortitza jasoko dituzte. “Gurutzada Santuaren” izenean egiten diren bidegabekerien lekuko da Migel, eta apaiz gazteak hierarkiari aurre egingo dio,kaltetuen alde jokatuz, Eliza altxamenduaren alde jarri delako, bizitza bera arriskuan jartzera iritsiz. Maitasun, guda eta erlijio istorio bat tartekatzen dizkigu Helena Tabladak filme honetan.


Gure herriko historiaren pasarterik latzenetakoaren beste ikuspuntu bat eskaintzen digu zuzendariak. Aukera edukiz gero ikusi beharreko filmea dela iruditzen zait. Benetan ederra!
Hementxe duzue trailerra:

ez zen gehiago txoria izango...

Mikel Laboa gaur goizaldean hil da. Euskal musikagintzaren erreferente handia da, baina are gehiago, euskal kulturaren ikurra ere bada. Gure artean ez dagoen arren, urteetan zehar egin duen lanak gure artean bizirik iraungo du beti.

Leioako campus berriari buruz bideolana

Hona hemen, azken urteetan Leioako Campusean egiten ari diren obrak amaitzean guztiak izango omen duen itxura. Gorka Palazio irakasleak egin duen bideo lana da honakoa. Nire ustez, Campusak horrela geratu behar badu, langileek ordu asko eman beharko dituzte oraindik lanean...

XXI.mendean irakastea zer den

Ekinez ikasten dela oinez esan ohi da, eta irakaskuntzaren kasuan ere, kontuan hartu beharko genukeen esapidea da hau. Zertarako ikasi buruz irakasle batek esaten duena, ikasleak beti sormenaren lehioa itxirik edukiko badu? Buruz ikasitako horretan trebatzerik ez badu?

Gizarte aurrerakoi batean bizi garela errepikatzen digute behin eta berriz, baina garai bateko irakaskuntza teknikek jarraitzen dute oraindik indarrean. Ikasleak entzule hutsa izatetik, parte hartzaile aktibo izatera iritsi beharko luke, horretarako: konpetizioa, kooperazioa eta kolaborazioa bezalako kontzeptuekin egunero lan eginez.

Ikasleei beren buruekin konpetitiboak izaten irakatsi behar zaie; beren mugak zeintzuk diren erakutsi ondoren, eduki ditzaketen oztopo hauek gainditzeko baliabideak emanez. Teorietatik praktikara jo behar da. Baina, irakaskuntzaren kontzeptu berri honetan, badira kontuan hartu beharreko beste ideia batzuk ere. Talde lana sustatu behar da, ikasleak ez duelako berak bakarrik lan egingo. Beste gizabanako batzuekin etengabeko kontaktuan egongo denez, kooperazio eta kolaborazioaren lanketa behar-beharrezkoak dira.

Aldaketa honen lehen pausoa ikasgelen itxura tradizionala aldatu eta hauek ere sormenezko gune bihurtzea izango litzateke. Aurrerapen teknologikoak ikasgela batzuetan sartu diren arren, ez dauka inolako zentzurik 1960ko egitura mantentzen duten ikasgeletan irakasten jarraitzeak.

John Holt-ek dion bezala, "irakaskuntza egoki baten etsairik handienetako bat soilik hitz egiten duen irakaslea da". Ikasleak beti gogoan eduki beharko lirateke beren parte-hartzea uneoro bultzatuz. Klase interesgarri eta parte-hartzaile bat eginez gero, ikasleen ikasteko gogoa ere areagotuko da.

Antzinako kolpe bidezko irakaskuntzarekin amaitzeko gai izan baginen, XXI.mendeko egoerarekin erlazionaturiko irakaskuntza sistema bat sortzeko gai izango gara. Oraindik asko dago egiteke eta inork ez zuen inoiz esan aldaketak ematea erraza izango zenik.

Bideoa ikusi

Lively.com by google

Joan den ostiralean lively.com webgunean egindako saiakeraren ondoren, programa hau gustatu zaidala aitortu behar dut. Ez naiz internet bidezko komunikazioaren oso zalea, zenbaitetan nahiko hotza gerta daitekeela iruditzen baitzait. Hala ere, lively.com jendearekin komunikatzeko era berritzaile eta dibertigarria iruditu zait.

17:30ak aldera klaseko hainbat jende bertan bildu ginen, baina gure ustekaberako, ez zen guztientzat leku nahikorik; honenbestez, klaseko zenbaitek eta irakasleak berak ere kanpoan geratu behar izan zuten. Hala ere, saio nahiko luzea egin genuen bertan geundenak eta bata bestearen "avatarea" zein zen ikusita txantxa batzuk egiteaz gain, elkarrekin komunikatzeko aukera izan genuen.

Azken orduko gora-beherak ekiditeko asmoz, aurreko egunean sartu nintzen "avatarea" egin eta programa ezagutzera. Uste baino denbora gutxiago behar izan nuen horretarako, guztia modu erraz batean egiten baita. Gmail kontu bat edukitzea da eskatzen zaizun baldintza bakarra. Avatarea aukeratu, itxura aldatu eta izena eman ondoren, gela bat aukeratu behar da. Pauso gutxi hauek egin ostean, herrialde ezberdinetako jendearekin hitz egiteko aukera izan nuen.

Beraz, lively.com orrialdea jendearekin erlazionatzeko modu interesgarri eta berritzailea dela iruditu zait. Chat bat izateaz haratago, denetarik (dantzatu, barre, negar...) egiten dakien pertsonaia bat sortzeko aukera duzu. Gela batean sartzean, bideo joko bat gogorazten duen gune batean sartzean gara, esan beharra dago, jendeak lan bikainak egin dituela bere gelak eraikitzeko garaian. Hala ere, badu konpondu beharreko arazo bat; gelek jende kopuru mugatua izatea alegia, horrek gure saiakeran arazo bat baino gehiago sortu baitzituen.

Egun, gazteen artean oso ezaguna ez den arren, pixkana-pixkana hedatu eta agian etorkizunean komunikatzeko erabiliko dugun tresnetako batean bihurtu liteke.

http://www.lively.com/

The corporation

Korporazioak, instituzioak edo psikopatak? Hau da dokumental honetan plazaratzen diguten lehen galdera eta egia esan, honi erantzuna ematea ez da ahuntzaren gau erdiko eztula. Zenbaitetan bertan azaltzen direnak, sinesgaitzak iruditzen zaizkigun arren, errealitatearen isla da filmea. Sarritan itsu agertzen gara mundu honen aurrean, begiak irekitzeko baliagarria izan litekeena, inongo zalantzarik gabe.

Korporazioen helburua, epe laburreko irabaziak lortzea da, sor ditzaketen kalteak kontuan eduki gabe. Lortuko dituzten irabazi ekonomikoetan jarrita dute uneoro gogoa.
Hemen saltzen dena, kanpoan ekoizten da, ekoizpen gastuak murrizte aldera. Esate baterako, bizi-baldintza jasangaitzetan bizi diren Bangladesh eta Txinako biztanleez baliatzen dira, asko gosez hiltzen dira eta eskeini dezaketen gauza bakarra eskulan merkea da. Enpresariei langileen egoera zein den ez zaiei axola beren ekoizpena handitzen bada.

Gerra ere zilegi da batzuentzat. Gogora dezagun, martxoaren 11ko New York-eko atentatuaren inguruan broker bati galdetzean, gisa honetako zoritxarrek onurak ekartzen dituztela erantzuten zuela. Sinesgaitza benetan! Lurra, ura eta airea publikoak direla uste dugu, baina inozoak gu! Hauek ere pribatizatuta daude. Zenbait lekutako euri-ura ere korporazio batzuen menpe dago. Adibidez, Venezuelan Cochabamba herrian izugarrizko iskanbilak egon ziren uraren auzia dela eta, baina, azkenean enpresa publiko baten sorrerarekin beren eskubideak asetzea lortu zuten.

Diru egarri horrek mugarik ez duela argi geratu da ondorengo adibidean. Dokumental honetan haur batzuk zorionak zuri abesten azaltzeagatik 10000 euroko ordaindu behar zitzaizkien AOL time Warner enpresaren filial batek. Egoerak honela jarraituz gero, agian, egunen batean gure haurrek etxean abesti hau abesteagatik ere honelako dirutza bat oraindu beharko dugu.

Gauza bat argi dago, ezin dela ezer egin korporazioen sarean erori gabe. Michael Moorek dioen bezala, zerbait egitea beharrezkoa da, korporatiben itzalpetik atera eta mundua berriro ere gure eskuetan egon dadin.

http://www.eduvlog.org/2008/10/la-corporacion-la-persecucin-patologica.html

Herri izenen ariketa

Irakurri arretaz ondoko esaldiak, ondo ahoskatzen saiatu eta esan bietatik zein dagoen ondo idatzita. Esaldiok telebistako zein irratietako informazio saioetan esateko moduan omen daude. Egilea: Gorka J. Palazio. CC 3.0 lizentziapean (byshare alike). Euskal Herriko Unibertsitatea.

0.a Al Gore estatubatuarrak, Luxenburgoko Dukerri Handia bisitatu ostean, Euskal Herriko bidea hartuko du mintzaldi bana emateko Bilbaon eta Gasteizen.

1a: Zenbait manifestaldi jendetsu egin dira azken egunotan Kazakhstango Errepublikan.

2a: Litekeena da Marokon edo Gambian izatea Aldaketa Klimatikoari buruzko datozen topaketak.

3a: Boliviar gutxi dira bertako hiru hizkuntzak, kitxua, aimara eta gaztelania alegia, menperatzen dituztenak.

4a: Georgiako hiriburua, Tbilisin alegia, euskaldunak non bizi diren eta georgiarrak eta euskaldunak aideak izan daitezkeela dakite askok.

5a: Abkhaziarrak georgiarren senideak dira hizkuntza aldetik; osetiarrek, ostera, kurdoen hizkuntzaren multzokoa dute mintzaira, senidetasunik gabekoa, alegia.

6a: Euskal arrantzaleek, Seychelletako Errepublikara jo dute ezinbestean, itsas-piraten beldur.

Top 7a

Jarraian nire top 7a:

1. Youtube: http://www.youtube.com/
Orrialde honetan bideo ugari daudenez, gure ikusentzunezko proiektuetarako baliagarria izango da. Honen bidez, besteen bideoak hartu, gure bideoak sarean zabaldu... daitezkeelako.

2. Zamzar:http://www.zamzar.org/
Formatu aldaketak egiten dituenez, gure lanekin izan ditzakegun formato arazoak konpontzeko balio dezake.

3. Ebay: http://www.ebay.es/
Bertan ikus-entzunezkoen munduan kaleratzen diren azken produktuen eskaintza handia agertzen da, baita bigarren eskukoen produktuena ere. Denda sarean dagoenez, internet bidez berehalako erosketa egiten da.

4. Wikipedia:http://www.wikipedia.org/
Entziklopedia librea, sarean komunitate batek sorturikoa denez jendearen parte hartzean oinarritzen den sistemaz baliatzen da.

5. Worldphotos:http://www.worldphotos.com/
Nazioarteko gai ezberdinen inguruko irudi ikusgarriak eskaintzen ditu.

6. Onlinenewspapers: http://www.onlinenewspapers.com/
Mundu osoko egunkarien zerrenda agertzen da, informazioa sailetan banaturik.

7. Google:http://www.google.es/
Eskaintzen dituen zerbitzu guztiengatik garrantzitsua da. Informazioa, argazkiak, berriak, bideoak, e-mail zerbitzua... eskura jartzen dizkigu.

Txolarre Irratia

Hona hemen wikipediarako Txolarre Irratiari buruz egin dudan azalpentxoa:

2000. urtean ekin zion bere ibilbideari Txolarre Irratiak, Tolosaldean martxan jarritako euskarazko lehen irrati libreak. Hasiera batean, tolosaldeko 30 herriotan soilik zabaltzen zituen bere uhinak: Andoain, Aduna, Larraul, Asteasu, Zizurkil, Amasa-Villabona, Irura, Anoeta, Alkiza, Hernialde, Tolosa, Ibarra, Elduain, Berrobi, Berastegi, Belauntza, Leaburu-Txarama, Gaztelu, Altzo, Lizartza, Orexa, Amezketa, Abaltzisketa, Alegi, Ikaztegieta, Baliarrain, Orendain, Legorreta, Albiztur eta Bidani-Goiatz. Gaur egun, berriz, irratiaren web gunearen bidez emisioa zuzenean entzun liteke edozein txokotatik.

Eguneroko programazioaren ardatza, TOLOSALDEKO AHOTSA izeneko magazina da (astelehenetik ostiralera 11etatik 14etara zuzenean, arratsaldez errepikatuta 19etatik 21etara). Programazioa Arrosa Irrati Ekoizpen Zentroari esker eta gauetan, borondatez izaten diren musika saioei esker osatzen dute. Horrekin batera, formaziorako eskaintzen dituzten saioak ere badira: astean zehar arratsaldez, Loatzo Musika Eskolako edota Anoetako Herri Ikastolako ikasleek hartzen dute hitza saio ezberdinetan. Bukatzeko, programazioaren beste ardatz garrantzitsua, HITZAK HEGAN magazina da: trebakuntzarako komunikazio arloan dabiltzan gazteek osatzen duten, hiru orduko magazina larunbatero egiten dena (goizeko 10.30etatik 13etara, igandetan errepikatuta goizeko 11etatik 13etara). Ikasle hauek saio honetan beraien ikasketetan ikasitako teoria praktikan jartzeko parada izaten dute. Gainera, irrati librea izanik, jendeak bere gustoko irratsaioa egiteko aukera izaten du, horretarako nahikoa baita ideia bertako lan-taldeari azaltzea.